RIBA KAYA

“Kore kore!… Abo bai pabou…, ami ta pasa di patras.” Miéntras e promé figura ta kore duru bai pèrdè den un hanchi skur e ta grita: “Na unda nos ta topa?” “Chin” e kontesta ta bin di e direkshon kontrali. Esei ta e último palabranan promé ku tur dos figura skur, disparsé den anochi. Zonido pisá di pia, i un rosea hanshá ta trata na pèrsiguí nan. Kachónan ta blaf sin miserikòrdia. Skuridat ta skonde e dos suhetonan. Niun hende no ta mira nan mas. Nubia ta tapa e tiki luna ku tin. Hanshá, sodá i rabiá un hòmber ta keda para na kuminsamentu di e kaya smal, skur i sushi kaminda el a mira e último suheto disparsé aden. Drenta òf nò? Kòrda e malechor ta skondé tras di kualke barí òf muraya ku un palu kla pa batié!? Ku duele e ta pensa riba su pòtmòni ku 200 florin aden. Ken a mand'é bin den e bario. skur aki? E ta disidí di bèl polis ounke ku e sa ku nan lo no por hasi nada. E no a mira ken a atrak'é i e lo no por duna un deskripshon. Solamente e sa ku nan tabata dos. Nèt ora e bira pa bai su outo bèk e ta mira ku su rabu di wowo su pòtmòni bentá kantu di kaya. E ta bula riba dje. Manera el a pensa, e pòtmòni no tin e sèn aden. Su sèn a disparsé. Aliviá e ta konstatá ku su reibeweis, papelnan i sédula si t'ei ainda… Hopi leu for di dje e dos amigunan atrakadó ta topa otro. Nan ta sinta riba stupi di un restorant chines den nan mes bario. «Kuantu sèn nos a gana?” Esun delegá, koló kòrá ta puntra e otro. “Lagami konta…” Esun mas skur ta bisa. “Nos tin 200 florin.” «Laga nos kita for di dje promé ku nan yega. Duna mi 100 florin pa mi warda.” Esun koló skur ta tuma e papel di 100 florin, dobl'é chikí chikí i hink'é den su boka, na su banda di kara. Di e forma aki e ta sigurá e sèn pa niun hende no hòrt'é. No ta e promé bia ku nan ta pèrdè nan botin. Nan a bira sabí. “Ban…ban…ata nan ta bin.” E malechor delegà ta bisa hanshá. «Nò, mi ke kome, mi no a kome awe ainda.” E otro ta bisa. «Pero nos ta pèrdè tur e sèn si nan haña nos! Ban!” Ku urgensia esun delegá ta ranka su amigu na su man. Kontra di su boluntat su amigu ta komplasé. Nan ta kore drenta mondi, sali na e otro banda i buska un otro chines pa nan kumpra un kuminda. Despues di kome diferente pia di galiña ku batata den sous i bebe un serbes nan ta lèn kontra di un palu. Ha, barika yen ta un bon kos. Ni un minüt nan no ta pensa riba doño di e sèn ku nan a hòrta.

Luisette Kraal

Buku

Buku terbitan